السلام عليكم ورحمة الله وبركاته.
من قصايد البدايات وأتمنى أن تحوز على بعض من رضاكم ..
الزلابة والله إن يقعد زلابة =وإن تلبس بالتكبر والمهابة
عاقة(ن) مايعرف دروب المراجل=علة(ن) في كبود ربعه والقرابة
الردى والطيب في عينه تساوت=كلها في سلمه الضايع تشابة
ما يحسَب للمشارية ولأهلها=ياعسى ربي يعجل في ذهابه
لو تبي تنصحه أبداً ماأنتصح لك=راكز(ن) خشمه ولا للنصح يآبه
شين نفسه مايجي غير القرايب=وللأجانب مخطر(ن) يهدي ركابه
عند الأجناب حر وحصان ومسرح=وعند ربعه ما يساوي له ذبابة
خرقة(ن) ما تنركز لو يوم رزت =عزتي لمنهو أحتزم به وأعتزى به
جعله فدىً للذي للطيب منصى=معطر(ن) ذكره ومحمود(ن) جنابه
منه الخملة حرام ما تطرى=وإن نطق ما ينطق إلا بالذرابة
مدته جزلة وضرباته عطيبة=مزبن الجاني إلا منه ألتجى به
شروى من يقرأ عسى عمره طويل(ن)= ويا عسى إللي مثله يخرف شبابه
وأنا مااقول القصيد إلا آتهيض=ولا يهيضني غناة ولا ربابة
ما يهيضني سوى أطياف خلي=لا حضرت كني وحيد(ن) وسط غابة
لو يناديني رفيقي ماالتفت له=ينقطع صوته وأنا ماأقول جابة
كني في دنيا عن الدنيا وأهلها=بس أفكر كيف وشلون اللقا به
كيف ألومه لو لقيته عن غيابة=وإن حضر قمت أمدحه وأنسى عتابه
وكيف أضمه لو لقيته وسط صدري=ضمة(ن) منها الشقي ينسى عذابه
وكيف أحط أصابعي في موج شعره=وكيف نابي يشتبك من خلف نابه
و كيف في لحظة غرام مستميتة=.......................................
وإن صحى خوفه في لحظة ثم نشدني=يا محمد الحياء من وين بابة
بقوله إن الحيا بابه مقفل =( والقفل ياخيش مدري من غدا به)
واصلي جعل الزلايب حذو رجلش= اللقا لحظات خلينا نهنى به
ياللي حبك ساكن(ن) في وسط صدري=وشايخ(ن) في سهول قلبي وفي هضابه
من أباح لعينك النجلاء عذابي=علميني إن كان في بالك إجابة
وأرحميني من عناك و من عذابك=وأدري إن الله شديد في عقابه
ولأجل ماتطول قصيدتنا وتسمج=مبتدانا بالردي والمنتهى به
وآنا بنصحكم وأجري عند ربي=والذيابة تفهم عواها الذيابة
الزلابة من بلي به فيتصبر=الشكوى لله الله إللي قد بلى به
ما يتعدل لو تعدل ميل ضلعه =والزلابة والله إن يقعد زلابة
وسلامتكم
محمد العرجاني
06-06-2005, 05:33 AM
صح الله لســـــــــــــانك الف مليون والله على ذا القصيده الزينه !!!!!
!!!!!! 
العرض العادي
