(( ما خاب من هو يعشق إخوان بدوه ))

[راشد المري]

قلـبٍ تعنّـا لـه ,, وقلـبٍ عنـا لـك
والفرق شاسـع بيـن عنـوه وعنـوه
جيتـك وأنـا مـا ودّي إلا وصـالـك
وأنـت الـذي بيـن المخاليـق نقـوه
أنـا بدونـك مـا بهـا شـك هـالـك
وإلا معـك دنيـاي يـا زيـن حـلـوه
ودّي أنـا اسكـن يـا حبيبـي خيالـك
وما ابي أعكّـر جـو فكـرك وصفـوه
لـو قلـت أدوّر يـا حياتـي بـدالـك
من هو يسد فـخانتك ,, وأنـت منـوه
أنـا وقلبـي والمشـاعـر حـلالـك
ويوم انتخى قلبك ,, لقـى فـيّ نخـوه
واللي خلـق زينـك وصـوّر جمالـك
كنت أحسب إن الحب في القلـب نـزوه
ليـن افترقنـا واصبـح الليـل حالـك
من ظلمتـه والشـوق لا شـك بلـوه
تبـي الصراحـة مـا قهرنـي دلالـك
لان الـدلال يزيـد فـي القلـب نشـوه
اللـي قهرنـي زلـةٍ فــي مقـالـك
وهي زلة لسانك عـن ألفيـن هفـوه
يا كيف أبقوى بس ( ربـع ) احتمالـك
وهقوتـك فينـي ماهيـب أيّ هـقـوه
والله إنـي مــا قــدرت أتمـالـك
نفسي ,, واشوفك صايرٍ فيـك قسـوه
يـا صاحبـي تبغـى جـواب لسؤالـك
دامـك معـي ماعـاد أبـي أي ثـروه
لـو يجحـدك عمـك وجـدك وخالـك
لاصيـر لـك دون المخاليـق عـزوه
خذ الكـلام اللـي تحطـه فـي بالـك
(( ما خاب من هو يعشق إخوان بدوه ))