السلام عليكم ورحمة الله وبركاته ..
أضع بين إيديكم هذه القصيدة المتواضعة .
عيت حروف القصايد في عيوني لا تشيب=كل ماطابت هجوسي جاها علم ونشّها
ماصويب إلا الذي من دورة الدنيا صويب=إللي لا طارت حلومه ولا قعدت في عشّها
ضاع وقته بين صابت أو عساها ماتخيب=لا خذا من الشام عذق(ن) واليمن ما دشّها
يالبيب العقل ياللي ما مثل عقلك لبيب=الوصل غصون رحمة والهجر محشّها
والخطا لا صار جالك من رفيق(ن) لك قريب=فلا تدقق ياالسنافي في الخطايا ومشّها
ماخلق في الناس كامل كل شخص وفيه عيب=والنوايا الله أعلم ! عن صفاها وغشّها
وأنت لو جالك تخير في الرفيق وفي الصحيب=فأختر أحرار(ن) نوادر والزلايب طشّها
أختر إللي لأستشاطت صامل ورأيه صليب=وأترك رخوم(ن) عرقها في اللزوم يبشّها
الشياة لها خوار والذياب لها قنيب=وأنت فطن(ن) وتعرف سرحانها من كبشّها
أبعد الله دار رجل(ن) في اللوازم ماينيب=شغلته يآكل وكفه في الجدار يمشّها
جعل أبيه الشين وأمه جعلها ماتجيب صيب=ودار(ن) يحل بثراها جعل يقطع رشّها
وسلامتكم