اليكم قصيدة الشاعر ذيب بن الذيب العجمى فى رجال يام عندما سيروا
على الامير منصور بن جمعه فى وادى العجمان
عند شيخ مع هل الطيب معروف نباه = اسمعوا ما قاله الذيب بعد البسمله
عن بن جمعه ارحب وربعه وقصراه = شيخنا اللي مع هل الطيب يرسي محمله
مرحبا بشيوخ يام مطوعة الطغاة = رحب الوادي بكم من علوه لأسفله
مرحبا يا ربعنا اللي لكم قدر وجاة = عند شيخ يرتكي للثقيل ويحمله
ربعنا اللي لا احتمى الهوش عيين عصاة = في الزمان الشين ميقافكم ما نجهله
موقف شرف وزوج مقنعة العباة = راجع التاريخ ياللي مكذب واساله
نرفع البيضا لكم من على راس النباه = يوم دزينا الشلايل وجيتوا بعجله
انتو الحصن المشيد وحنا من وراه = لا عناكم كل حمل ثقيل ننقله
ويش يسوي البيت لا صار ما يذري ذراه = قالوا العراف مال الثقيل الا هله
جعل بيت ما يذري يموت اللي بناه = يعرف الرجال من طيب راسه وعمله
حدنا من ماضي الوقت ما يدعس حماه = كم عقيد قد غزى حدنا ثم همله
وكم وكم من منهل قد شربنا حلو ماه = وكم خذينا جل ذود العدو من منهله
شاعر ما يذكر امجاد ربعه لعنباه = ويش يسوى شاعر مجد ربعه يهمله
مدح ربعي فرض واجب كما فرض الصلاة = من عجايب فعلهم كل جيل ينقله
تو ما جا للقصايد يابن جمعه طراه = قرب الدفتر وكل يجيب مسجله
مرحبا عداد وبل تحدر من سماه = من هواجيس تجيب العسل من منحله