اهديكم مجموعة من القصائد الرباعيه
للشاعر الكبير / سعد بن جدلان
***
الا ياعيون موحشٍ مابعد لزم
عدّا كل صقارٍ بشبكه ولا لزمه
على القلب نارٍ ولعت في قرى حزم
وحطوا عليها من دقاق الحطب حزمه
يقاويك ابن جدلان بالصبر والعزم
لكن حبك الصافي تغلب على عزمه
تراني دخيلك ياوليفي من الهزم
تموت الغزو ولايقولون منهزمه
***
ياصباح الخير يسعدك ربي من صباح
الصباح اللي تهيا به الوجه السميح
يالطيف الروح بعدك علي سمٍ ذحاح
ليت نظراتك تعلمك عني بالصحيح
ياقراح البيض كان البني فيهن قراح
اشهد ان زولك مليحٍ ومنطوقك مليح
كل شيٍ قد جمعته على الدنيا وباح
غير حبك يا اريش العين عيا لايبيح
***
يامرحبا ياصاحبي طيب الصحبه
ياللي تصادق مع وليفك وتوفي له
ياللي كلامك من غلاك اتقرّح به
هرجك يوسع خاطري من شفاتي له
كن الكواكب في محياك منسحبه
تلعج مقابيس الدجا من ورا الشيله
الاحساد فرقا شملنا لاتفرّح به
اللي معوشتهم على الذل والحيله
****
يامجمول حبلي من عدود الموده جذب
ولاتحسب ان غزوي عقب نكفي هويّن
مشوارٍ خذيته حط وسط الضماير شذب
من الجسم يبرن الكوايا وهو بيّن
يبوط الهوا لاعمّروا به خداع وكذب
لو حفّوه بالترحيب والجانب الليّن
لا اخطيت السدود المبهمه والكلام العذب
احسن للهوا يرتاح واحسن لي اديّن
****
ياكبد ياللي من الحرمان منهشمه
فيها من العام نجارٍ بشاكوشه
واللي هشمها شفاةٍ دونها حشمه
ارهي على اللي تبي نفسي ولا انوشه
حجزٍ يرد الرجاوي من ورا خشمه
ان ردها الحجز ولا ضاع فالطوشه
عمر بيوتٍ على بيبانها رشمه
وبطونها بأفخم الشيراز مفروشه
****
لعنبو من لامني لاتجاهلت الوداع
الموادع حط وسط الحشا جرحٍ شنيع
الموادع حط قلبي من الفرقا رعاع
والسبايب كيّتينٍ مضاربهن جميع
كل ماتطري علي المظاليل الوساع
اتزفر زفرتينٍ يشيبن الرضيع
طامعٍ في مهرتن لاتسام ولاتباع
مابي الا هي وربي رماني في شفيع
****
كم مفرقٍ كل ماجيته تعديته
لا اشوف خطه ولا اقرا ويش لوحاته
ياكود مفرق رقبة العطف لاجيته
يفرض علي الألتفاته والتنهاته
في حشمة اللي مصافيني وصافيته
من خلقتي ماحدٍ سوا بي سواته
مايسمح البال لين اقف على بيته
اضرم له اضرامة الزيدي على قاته
****
انا يوم اجي وامركم ياوليفي حنج
ولا ودي اقرا بك تلد النظر فيّه
لعب بي كلامك فالخفى لعبة الشطرنج
ليا دار لعبه بين الاعضاء السياسيه
وسبح بي غرامك سبح موج البحر باللنج
غفلت وغدا بي حبك شويّه شويّه
لاشفت زولك قام يدخل عضامي بنج
اسولف مع العالم وقلبي له نحيّه
****
انا اللي همومي صايراتٍ علي كدر
لو انها تحول فوق غيري فقد عقله
لامنه اشتغل موضوعها داخل الصدر
تقل فايزٍ وسطه فريقٍ يصفق له
على الصاحب اللي مانويناه بالغدر
شفوقٍ علي وانا ماغير اتشفق له
بنا بيت حبه فالحشى واسس الجدر
وخلى معاليق الضماير تخافق له
****
الله يرحم بوك وامك ويلحقك بهواك
كلنا للي تقولين اذان صاغيه
انتِ مطغيك البها لين حدد مستواك
يعني اكبر مجرمة حب واكبر طاغيه
شوفتك للي فؤاده مريضٍ في حراك
جنّتن ماينسمع في طرفها لاغيه
انا يوم اغليك واجيك وادور رضاك
باغيه نفسي ولا ادري وشنهي باغيه
****
بهجة عيوني على الدنيا ورونقها واملها
صاحبٍ لا امل من شوفه ولااسمح من كلامه
شوفة عيونه تكفيني عن الدنيا واهلها
كل نظره من حدث الاحوال تعطيني علامه
وان ذكرت مرصعاتٍ بالزمرد لا عزلها
يا صلاة الله على وجه الرسول ويا سلامه
اعتقد من قابل الدنيا ولقته بقبلها
عاش في برزخ سعيد القبر الى يوم القيامه
****
انت يانصاب ياهوه ياحظرة جناب
كل مادار النظر فيك شيٍ لب له
اعتراضة مهرةٍ في غيادين الشباب
والتصفح خيرة البل مع المتوبّله
لانصبت بفاتناتٍ تحزم بالثياب
ونرجسيات تخلي العقول مهبّله
لو حصل لي منك يازين مالذّ وطاب
احتفلت وجبت لي رقاصتٍ ومطبّله
****
ياراع الوساع السود ياناسع الخمري
علي الحرام اني على شوفتك ضامي
جمال الخصال اليوسفيه يغلب امري
عذابٍ على من حج لله ومن صامي
ياراسي وياصالب عضامي وياعمري
يجيني بلا لاشفت صورتك قدامي
اشوف الحياة اللي يغني لها القمري
على حاجبيك السود في دمّك الشامي
***
(( قصيده مهمله - بدون نقط))
مع الهم والوسواس والسهر والولوال
ادلّه هموم الصدر والصدر ما دله
احاول على حلو الحلاوه وهو محال
وحاول ودار الحول وعمله عمله
سهوم الوساع السود لأهل الهوا سلاّل
لاسلهم سحى سلهامه سهومٍ مرسله
هو اللولوه وهو الدراهم وراس المال
وملا ملك له لولوه لا حلالٍ له
****
راكب اللي فارضٍ جودة الصنع افتراض
في جميع اللي ورد فالبواخر والفرض
كن حاله مع رفيقه يهدد بأنقراض
طامس قلوبه هران وانفسها مرض
ما دروا عن قصته اهل الحسا واهل الرياض
من غدا منهم على هيت عيّن في حرض
كن اسطبّه ورا لاتنحّى خشمه وراض
مقطع المنشار في روس عودان القرض
****
ياقطات كروش ياعيون الوحش ياغزيّل
ياذهب يافرنك يادولار يا اغلى عمله
والله اني ودي امسي عندكم واقيّل
بس لاتدري هلك شنّوا علينا حمله
ماجرحني وجرح المجماج وابن سبيّل
كود حب السلهمه لا ماتفرّق شمله
والله انك خيرة المكسب بغزو هليّل
لكن الله يقطع الحسره وقل الصمله
****
ياللي تقول الشعر همزه وكسره
يقول فكرك مقديٍ وانت ما اقديت
اسرح نهارك وان ضوا ليلك اسره
وتعود من بحر الشعر مثل ماجيت
احلا مذاق الشعر سهله وعسره
عسره على الابداع سهله ليا اوحيت
يضرب بها فوج الدواوين جسره
ماهوب لامن جاب بيتٍ سقط بيت
****
المحيّر لاتصادم وصولٍ في وصول
الوصول تواصله والوصول تجنّبه
والله اني مدري ويش اسوي ولا ادري ويش اقول
الحقايق تيقض اخر سبات وينتبه
البها الفتان يخلف موازين العقول
والغلا يثّر على النفس لومه وعتبه
للبها والصوره اليوسفيه والقبول
يايبه من لهفتي واشتياقي يايبه
****
على اوراق الصحافه يابساط الساحه الممدود
احس اني قلم واليماني البيض تكتب بي
انا يانجد ورياض المحبه والله المعبود
ماراودني سهى حب الرياض ونجد تعجب بي
احبك يا الرياض ام المكارم والرخى والجود
على هامتك جلباب النشيد الذوق واللبّي
احبك يالرياض العاصمه من حبنا آل سعود
لكن هالحين حبي هاربات الشعر من حبي
****
(( وفي إبله )) قال:
معي كل زين لذّته تنسى في ساع
يكود العفيشه والطويله وطياحه
لكن وصف رقابهن من ورا القرّاع
هرّيب السحاب اللي تواليه مماحه
لامنها عطتك وجيه والنحور وساع
وقام القمر يلعب بنحورهن نداحه
تقول اني اسولف مع عنّسٍ فزاع
هذي حبها غامض وهذيك مزاحه
****
ظروف الشدايد سدها للمراجل فيد
ويقدرها راع الوجهات والنصب والبرقه
الا حاجتينٍ تظهر اللي مداه بعيد
لياطال المرض ولا لياطالت الطرقه
هذي والله اللي يظهرن الردى والجيد
ومن فاز بالثنتين ذولي ظهر فرقى
نبات الفلا يابس وتسفي عليه البيد
وعرق النوامي بالثرا سابحٍ عرقه
****
يا عنا القناص يالصيد المدسّم
ياكتاب الشمس وكتاب الطلاسم
امسك اعصابي واذا شفتك تبسم
كنك تكويني على الكبد بمياسم
كن بياضك مع حمارك لا تقسم
عارضٍ في وجنتك موكب مراسم
حبكم سيطر على قلبي ورسّم
مثل ماسيطر على بغداد قاسم
****
طلعتك ياشمس كلٍ ينتظرها في محله
المفتح ينتظرها والأكفا تنتظرها
ياطلوع الشمس وهاج المصابيح المطلّه
نورك الوهاج يشرق للأوادم في ديرها
وخاطري مكسور من شيٍ بغاه ولاحصل له
والخواطر مايجبرها يكود اللي كسرها
والمصيبه كاسر الخاطر يريس العلم كله
سالفه يقدر يشعبها ويقدر يختصرها
****
الأمور المغريه والعالم النصابه
والله انها تتعب الواحد وتبحث سدّه
فيه شيٍ مثل فال ماحسبت حسابه
وفي شي تذكره مده وتنسى مده
وفيه شي يجبر العاقل تثور اعصابه
لين ضغط السكري فيه يتعدى حده
واخرتها كل واحد عند باب اصحابه
افتحوا ولا قلبناها عليكم هدّه
****
القلب ماهز ثقله كل مزيونه
الا الجمال المثير المغري الفارق
كان الشهاده لغرقا الحب مضمونه
فأنا شهيد الوساع النعّس الغارق
ذهانة الوجه والحجان مقرونه
وخد شعاعه كما شمس الضحى الشارق
وليا انثعى الخمري المسدول من دونه
ليلٍ تبدد ظلامه نجمة الطارق
14-06-2012, 04:00 PM
الا ياعيون موحشٍ مابعد لزم
العرض العادي
المواضيع المتشابهه
