اخوي طاب الكيف له و التعاليل.. وجد من خذوا ابله العجمان ,,

[مسعطر]

السلام عليكم و رحمه الله و بركاته ,,

اخوي طاب الكيف له والتعاليل


قائل هذه القصيدة هو الشاعر المعروف سويلم العلي النويصر السهلي رحمه الله :

اخوي طاب الكيف له و التعاليل = صدره وسيع ولا تجيه الهمومي
لا واهنيّه له شْبوح ومراسيل = وانا شْبوحي ما تجيب العلومي
البدو شالوا نوّهوا بالمراحيل = و كل ٍّ رِكَض للزمِل شِلاّه تومي
حَدٍ يِخِمّ العِلْق يِخْطيه و يشيل = وْحَدٍ تِقَلّل ما بِقي له لِزومي
شالوا وقفّن الظعاين زعاجيل = شَفّوا وْهَفّوا واتّقوا بالحزومي
و انا بمرقاب الشقا عيني اتخيل = في راس مرقاب ٍ طويل الرجومي
أخايل الاظعان واقفت مقابيل = استقبلن ظعون زاهى الرقومي
و ايّست من دعّاج الاعيان بالميل = ولا لي على نابي الردايف سلومي
وا هَجِرْ قلبي كان هو طاول الطيل = عز الله اني مهجلٍ كل يومي
هْجال من تاهت عن الذود بالليل = ما بين سرح لوارد الجو تومي
الولف بلوى به هبال وهرافيل = لولا الحيا راعيه يرمى الهدومي
يا لايمي جعله بحسر وغرابيل = الله يبلا بالبلا من يلومي
عساه بالدنيا قليل المحاصيل = وبالآخره يسقى حميم وسمومي
وجدي عليها وجد من له مواحيل =حيل ٍ و خلفات ٍ تدوس الوسومي
و عشاير ٍ شِقْح ٍ ْتلاد و مخاليل = و معهن على شقران فِلْوٍ قحومي
سِبِّر لعجمان ٍ على كِنّس ٍ حيل = شيب المتون عيونهن تقل لومي
كل ابلج ٍ ضار ٍ بكسب التنافيل = ضرما يبون المال ما فيه لومي
و غارت عليه القوم خيل ورجاجيل = و طبّح على فِلْو ٍ حَشُور ٍ عَزومي
و اقفى يرادي به عن الخيل حِلْحيل = شَذْر ٍ حَذِرْ تالي شْيوخ ٍ قْرومي
و اقفت على ذوده عصاة ٍ مشاكيل = ْو كِلًّ ً على حَقَّه شِحوح ٍ بِحومي
وصلّه و خلاّ العج مثل المخاييل = عج الرمك و البل مثل الغيومي
يبي يداري هرجة القول والقيل = أحضر حياه ولا بنفسه وْهومي
و طبّح له اللي ضاريٍ بالمحاويل = وثارت إلى ان حْذاه مثل النجومي
و اقفى مْذِلًّ مع دكاك الغراميل = يفرك يديه ومر كبده يزومي
عقب السعد و العز و البن و الهيل = و كبش ٍ مْرَبّينه لكل محشومي
اليوم يسهر كل ما جَرْهَد الليل= و دايم على غيضه صنوت ٍ كضومي
هذا وجودي وجد من له مواحيل =من عقب ما هي ذود صارت قْسومي
أو وجد من صدّر على اربع محاحيل =لها.. ْليا غاب الرقيب معلومي
صدّر على اربعماية ٍ كلها كيل = حبًّ حمر تسقي نواحيه كومي
اربع عقايبها اربع ٍ كِنّس ٍ حيل = و يشيلن الما في وساع الكمومي
يوم استتم الزرع شال النما شيل = نِشَّت بردها كبر روس البهومي
و هلّت على وصط المفالي هماليل = و صارت على روس النواحي رجومي
و اللّي بقى من حبّها شاله السيل= غثو السبل بالسيل مثل الهدومي
و اصبح يصيح و يزعج الويل بالويل =عن نول ما نالت يديه محرومي
الله يكفينا شرور المخاييل = الا عطا الرحمه كما انّه رحومي
ما قلتها باللّي تعرف التهاويل = ولا هي من اللّي يجمعن العلومي

و سلامتكم ,,

[راكان اليامي]

لاهنت يامسعطر وصح لسان السهلي

[ليــه يازمـــن]

صح الله لســانه والله يــرحمه

ولاهنت على القــصيده

[someone]

لاهنت وصح السان قايلها

[هادي بن فهاد]

صــح الــــسان شاعرها ولاهنت يامسعطر

[مسعطر]

يا مرحبا يا راكان و مشكور ع ردك و مرورك

[عبيد العرجاني]

صح لسان شاعرها

وجعلك تسلم ع النقل طال عمرك

[مسعطر]

ليه يا زمن ...
مرحبا بك و مشكور على مرورك..

تقديري و إحترامي

[سمو الرووح]

الله يرحم قايلها ويطول الله بعمر ناقلها

ولاهنت يا مسعطر شكرا لك على الاختيااار المميز


وفقك الله.

[ابن هندوس]

صــح الــــسان شاعرها

ولاهنت
يامسعطر