ياحايره : في خاطري من ليل الاوّل كلمتين : = الحق عمره ما هدّم / والهجر عمره ما بنا
اصارحك .. لو ادري انك من كلامي تزعلين = اكذب عليك ان قلت لك تراك في قلبي هنا
انتي مكانك : بين قلب وبين روح وبين عين = الا اليدين اللي من اللهفه تقول ( الله لنا ) !
عزالله اني ماكشفت ستارة السر الدفين = حسبي عليها الكلمه اللي فرّقت من بيننا
ناديت بأعلى الشوق لكن الصدى صوته حزين = بالله شوفي كم خسر صوتي وكم صمتك جنا
كنك تقولين .. بـتطلعك القمر والفرقدين = راحت مراويح السحاب وراحت ايام الهنا
الحب لو طال الجفا والصد , إذا ما تعرفين؟ = غصن ٍ تلاعبه الهبايب / كل ما طال انحنا
ياحايره غدر البحر , عرفت سرّه هالحين = من أزرقه , يوم ازرق دموعك مثل زَرق القنا
غدرني وحطّم قواي , ولان عزم ٍ ما يلين = ووقفت مثل اللي قبل لا ياصل الحلم , انثنى
انتي وقفتي في يمينك عشق ويسارك ونين = فيك التعب واضح ومن ثروة ملامحك اغتنا
وانا .. تحرّيتك مثل من يحترون الغايبين = يا مجملّه لون العذاب بـعين من صبره فنا
لـخاطر ايامي معك / متى تجين وترجعين = مافيه درب ٍ من دروبي ما تقرّبك ودنا
العمر : شوفي كم عطيت ولا خذيت من السنين = الحب : شوفي كم خذيت ولا عطيت من العنا
الصدق : ما جيت اكتسب به لا حنان ولا حنين = الشعر : مارحت افتخر به وآنتظر منه الثنا
تخيّري فـ.. آيّات درب من الدروب وتوصلين = العمر انا , والحب انا , والصدق انا , والشعر انا!!