السلام عليكم ورحمة الله وبركاته
انتقل إلى رحمة الله مساء البارحة شاعر المحاوره الاول و شاعر قبيلة العوازم " نواف بن منور العازمي "
إثر حادث مروري أليم , وقد تمت الصلاة على الفقيد بعد صلاة عصر اليوم الإربعاء في الكويت
إنا لله وإنا إليه راجعون , ولاحول ولا قوة إلا بالله . . . والله يرحمه ويسكنه فسيح جناته
- وهذه مرثيه لرفيق دربه الشاعر الكويتي المعروف " ذيب العمودي الشمري " :
كن الخبر رمحٍ تخلل ضلوعي=رمح الفراق اللي للاعمار قصّاف
صحيح ماهو واحدٍ من ربوعي=مير الوفا فوق الطوايف والاطياف
شقيق فكري في بداية طلوعي=اخوي في حكم العوايد والاعراف
بين الصفوف الحاميه والجموعي=ياما لنا في ساحة الشعر ميقاف
بالقاف يضربني على راس كوعي=واضربه مابين الحجاجين بالقاف
على الشرف ندفع سلاح الدروعي=من شان تعزيز المواقع والاهداف
في علم ترويض الاسود الهجوعي=في ساحته صرنا مروّض وعساّف
حتى بدت تمشي بطوعه وطوعي=والسبع راقي بالتعامل ليا خاف
واصبح حليفي بأتحاد الفزوعي=يوم الزمان اصبح مجاميع واحلاف
من سنة الرحمن ماني جزوعي=لكن معي قلبٍ من الود شفاف
حفظ الصداقه من جواهر طبوعي=اموج بالذكرى شراعٍ ومجداف
ادفع ضرايبها ولاني منوعي=مااظمها في خاطري شكل وغلاف
عليه من جوع الغلا زاد جوعي=ماهو مثل جوع البهايم للاعلاف
جفت ينابيعي ويبْست زروعي=عشرة عمر نسيانها ظلم واجحاف
وفي حين صلينا عليه بخشوعي=وحطوه في قبرٍ فصال اربع اطواف
اقفوا وانا عنده تذارف دموعي=اخر رجل واقف على قبر نواف
يامن لحكمك معلنين الخضوعي=انت الكريم وتكرم الضيف لا ضاف
عبدك وضيفك في مقامٍ يروعي=عن رحمتْك ماله وساطات واسعاف
يالله لاتحصي عليه الوقوعي=في ما نهيت.. وشفت والغير ماشاف
وهذه أيضا مرثيه أخرى للشاعر الكبير " سعيد أبوديه الحازبي في الفقيد :
في سابع ايام شهر الصـوم وادعنـا = رجل (ن) عزيز (ن) علينا يالله الخيره
انا اشهد انه خبـر محـزن وروعنـا = والحمـد لله علـى حكمـه وتدبيـره
نواف شيخ الحكم والشعـر والمعنـى = شهم النبا طير شلوى طيب السيـره
قبل امس راعي الوفاء والطايله معنا = واليوم يبكي عليه الشعـر والديـره
ياما ويامـا علـى العليـا تجمعنـا = على الوفا والمعـزه مـن تباشيـره
ون مات نواف ذكـره باقي(ن)معنـا = مامـات ذكـره ولا حبـه وتقديـره
يالله تحسـن عزانـا فيـه وقنعـنـا = بالصبر وغفر له ذنوبـه وتقصيـره
مرحوم ياللي بشهر الصـوم وادعنـا = انا اشهـد انـه فقيـده يالله الخيـره