قصيدة الشراري اللي مدح يــام وقصتها والردود عليها

[عبدالله آل عامر]

هذه القصيده للشاعر: سالم مقبول حديجان اللسون الشراري.
عندما تعين في منطقة نجران عام 1422/1423هـ هو ومجموعة من زملاءه من الشرارات ـ ولما واجهه هو وزملاءه من حفاوة وترحيب وتكريم من أبناء قبيلة يام سواء في العمل أو في الدوائر الحكومية أو من الجيران وأيضاً هناك رجال كبار في السن من يام مجرد سماعهم أنهم شرارات رحبوا فيهم أجمل ترحيب لتقديرهم لقبيلتنا ، وأيضاً لمكانة الشيخ: صامد النصّار رحمه الله الذي خدم في منطقتهم ـ وفي نهاية العام الدراسي كتب الشاعر القصيدة كشكر منه ومن زملاءه لأبناء قبيلة يام ـ وبعدها أقام الشيخ: عبدالله الربيعي اليامي شيخ الربعة من يام حفلاً كبيراً كتوديع لهم بعد خبر انتقالهم من المنطقه ـ وفي ظرف ثلاثة أيام إنتشرت القصيده في منطقة نجران وفي كل قرية وهجرة ـ

وهذه القصيدة:
إلى أهل نجران إلى قبيلة يام أهدي لهم هذه القصيدة:
((درة الجنوب))

بسم الله أبدأ فارض خمـس الأركـان=اللي ختـم باليـل ضـوح النهـاري
ذليل من لا كـان عصمتـه الإيمـان=ولا خاب من هو بالأمور استخـاري
ومن بعد ذكر الله آبـا اقـول بلسـان=وأبـدي بشـيء فيـه واثـق وداري
جابتني القسمة علـى ديـار نجـران=وكلن عن المقسوم مـا هـو بـداري
ولجيتـي مـا كـان بالبـال حسبـان=وما كان قبل آجي عنـدي طـواري
لأني بعيد ديار .. مـا هـو بنقصـان=بأرض الجنوب وأنا بعيـد مـزاري
نسمع بهم بالطيب وبالوصف شجعـان=وفي مدحهم كلن قصـر بالمحـاري
من الشمال مـن الهبايـب والأمـزان=ومن وادي السرحان يبـدا مسـاري
من جوف مارد والصعيدي وسرحـان=ومن زعبل لكاف وسمـر الحـراري
ومـن الحديثـة و القريـات عنـوان=ومن سهلة بسيطا وفيـض الخبـاري
من الميسـري و النبـك دور وقلبـان=ومن طبرجـل والنبـاج وشغـاري
وحرار ليلى ومن عرايس على صفان=ومحميـة الخنفـة لتيمـا يـسـاري
وادعت أنا أحباب وصحبـه وخـلان=والقلب من فرقـا المحبيـن ثـاري
سافرت عن ناس لهـم بالغـلا شـان=ربعي اليا مال الزمـن و استـداري
أولاد مكلـب مـن سـلالات قحطـان=عون الصديق وخصم للـي يمـاري
اللـي يمـدون اللبـن كـل الأحيـان=واللي لهم في كـل عـزم اقتـداري
عنهم و في قلبـي مـن الهـم نيـران=نويـت بالممشـا ولا بـه خيـاري
لدرة جنـوب المملكـة أرض نجـران=يـوم لفـا التعييـن دون اختيـاري
لخدودها و لسدهـا ماضـي وأزمـان=ولجبالهـا وسهولهـا و الـبـراري
الله كساها مـن الحـلا كـل الألـوان=و عطورهـا عـود وبـن وبهـاري
وحسن الطبيعـة فـي تـلال ووديـان=والمي والخضـرة وزيـن العمـاري
لفيـت نـاس بالمكـارم لهـم شـان=اهـل مواجيـب بحسـن الجـواري
ناس لهـم بالمرجلـه مجـد و عنـان=ولهم بهـب الريـح ذكـر وطـاري
هم للكرم والجـود موطـن و عنـوان=وهـم للشدايـد والفـزع والكـراري
منطوقهم أرحـب وحييـت يـا فـلان=تلقى التحيه مـن كبـار وصغـاري
ما جور منا و السلامـه و الإحسـان=كيف أنت ، طيب ، ويش حالك عماري
أرحب وقلط لك علـى حيـل سمـان=وتلقـى العلـوم الغانمـة بانتشـاري
محزم وجنبيـه زهـت فـوق الاردان=وعصبه على الراس تلـف وتـداري
رجال يام أن جيـت شيبـه و شبـان=نعم بهـم وان حـل فيهـم طـواري
ربع لهم بالحـزم و الموزمـه شـان=سواطيا يشـرون مـوت الحمـادي
وأنا أشهد أن الطيـب كلـه بنجـران=شهـادة مـا هـي لبايـع وشـاري
هذي شهادة حق مـن قلـب ولسـان=ويالله عسى قـول الحقيقـة شعـاري
و الحمـد لله كلنـا بأمـن و أمــان=بالمملكـة عـم الرخـا والوقـاري
اله الثنـا و الشكـر منـا و عرفـان=ساد الأمن والأمان مدن وصحـاري
ترعى الغنم بجانب الذيـب سرحـان=واستفلت الغـزلان هـي والحبـاري
بأرض السعودية جماعـات واخـوان=من وين ما وجهـت الـك افتخـاري
وبالخاتمة صلوا علـى نسـل عدنـان=عد المطر واعداد رمـل الصحـاري
وأنا اعذروني إن كان بالقول نقصـان=وتقبلـوا أشـواق شاعـر شـراري

الشاعر: سالم مقبول حديجان اللسون الشراري

--------------------------------------------------------------------------

وجاء عليها من الردود مايلي:

1-الرد الأول: للشاعر: عبدالله بن محمد الربيعي اليامي التي ألقاها في الحفل أمام الحضور وهي:

يامرحبا وعداد ماهملت الامزان=ومالاحت بروقه وماهبه الذاري
ويامرحبا من كربلا لي بلد نجران=ومن حضرموت لغرب جده الى الساري
بمن هو كتب خطه وضح له العنوان=ومن قبل اشوفه له معزه ومقداري
وهو من رجال ذكرها من قديم ازمان=شراري بوقت الضيق بيدوس الاخطاري
هل الطيب والنالات لي عدو الضفران=يردون وسق القوم لي دبر اجباري
اقوله وانا من صلب يام ان بدالي شان=وهم عزوتي وافخر بيام على الطاري
ولاخير في قولٍ نقوله بلا برهان=ويشهد لقولي العارف اكرار ومراري
وبثني التحيه له وبدل الجميل احسان=على لسان يام ابلغه شكري اسداري
واطلب من المولى يفكه بلى الازمان=ويعطيه من خيره ويكفيه الاشراري
وصلوا عدد ماهبته رايح النيدان=وعد البشر وعداد ماخطه القاري

الشاعر: عبدالله بن محمد الربيعي اليامي

--------------------------------------------------------------------------

2- أما الرد الثاني جاء من الشاعر الكبير: عبدالله بن صالح السكران الصقور اليامي ونصها:

هذه القصيده رداً على قصيدة الشاعر المنصف: سالم مقبول حديجان اللسون الشراري من درة الجنوب نجران إلى لؤلؤة الشمال ((طبرجل)):

يالله ياللي له على الخلق سلطان=سبحان من بالغيب عالم وداري
سبحانه اللي لي ومر كاينٍ كان=أمره وتدبيره على الخلق جاري
ومن بعد ذكر الله ابا اقول قيفان=رداً على منظومتك يالشراري
يامرحبا ترحيب صادق وطربان=ترحيبةٍ فيها احترام ووقاري
اهلاً عدد ماغرد الطير بالحان=واعداد ماهبت هبوب الذواري
بالشاعر اللي حط للشعر ميزان=قوله كما در العراب البكاري
من ساكني نجران حضرٍ وبدوان=اهل المدن واللي سكن بالبراري
باسمي واسم مكرم ويام وهمدان=اقوم بالواجب وفيه اعتذاري
العذر في التأخير ياطير حوران=حالت ظروف الرد دون اختياري
منظومتك در ولولو ومرجان=منظومتك يشدو بها كل قاري
لاهنت ياسالم وشرواك لاهان=يفداك من قوله من الصدق عاري
ويفداك من قلبه بالاحقاد مليان=ويفداك ابو وجهين لوكان جاري
قصيدتك تاج على الصدر نيشان=وحنا بقولك يالشراري نماري
انصفت والمنصف يجازى بعرفان=والقول في معناه يظهر مواري
المدح لاهل المدح ياذرب الايمان=مثل القمر في مظلمات الغداري
ياولاد مكلب علمكم عم الاركان=والطيب سميناه واسمه شراري
اهل الكرم والجود ذباحة الضان=بالجود ماحد للشراري يباري
وان جا نهار فيه خاسر وربحان=واشتدت الازمه وثار الغباري
فالعز لاهل العز من دون خسران=لاولاد مكلب في نهارالمغاري
ياسالم اسلم بلغ اهلك والاخوان=وسلم على ربعك كبار وصغاري
وسلم عليهم باسم شاب وشيبان=ولاتقطعون الوصل معنا حذاري
وابشرك بالخير والعلم قد زان=ونجران عامر من عماره عماري
في ظل حكامٍ لهم فضل واحسان=عشنا بامان الله والخير جاري
الله يديم الحكم للي لهم شان=ابحق من بيته لخلقه مزاري
وحنا نعاهدهم على طول الازمان=عهد الوفا والصدق والكل داري
اطول حدود المملكه حد نجران=يسكن بها اليامي جبال وصحاري
من منطقة جيزان الى دولة اعمان=عبر اليمن نجران مرسى مساري
واحدودنا مالشرق ديرة نهيان=من شرق ابا الخريت مقطن خياري
ونفخر بحكام حمو كل الاوطان=والمنطقه تفخر بحكم الاداري
مشعل يدير المنطقه ذرب الايمان=قال الموده والمحبه شعاري
لم الشمل والكل اخوان واعوان=على طريق العز سرنا وساري
هذا كلام الصدق قول ابن سكران=والمعذره لو في الكلام اختصاري
وصلوا وصلى الله عدد نبت الاغصان=واعداد وبل هل والسيل جاري
على الذي مبعوث للانس والجان=يشفع لنا من زمهرير وناري
محمد نبي الله هو خير انسان=على سنته نمشي وبه يستجاري

الشاعر: عبدالله بن صالح السكران الصقور اليامي

[عـسـاه خـيـر]

الاخ عبدلله ال عامر لاهنت على النقل الجميل صحت السنتهم جميع على الابيات والردود.

[عبدالله آل عامر]

ولانت يالقرم ويستاهلون الشعراء كل خير على هذه المشاعر الصادقة

[مسعطر]

عبدالله آل عامر ..

صح نقلك اخي العزيز ..

و صح السنت الشعار كلهم ..

تقبل مروري ..

[عبدالله آل عامر]

صح بدنك ولاهنت على المرور