صباح الخير ياغالين
هذي بويتات من موقف مضحك ومحزن بنفس الوقت صادفني يوم كنت في سويسرا قبل شهر
صادفت سايح ياباني في يخت ودردشت وياه عنقليزي طبعا عاد انا بلبل بالانجليزي اللي يتكلم هناك انجليزي كنه يتكلم عربي ... ادوره دواره . مافيه الا فرنسي والماني
المهم ماودي اطلع من سياق او لب الموضوع سألته شرايك في اوروبا والمناظر الحلوه هذي !
قالي اوروبا رائعه وسويسرا جنتها واحلى بقعه فيها وزياراتي دائم تكون ل سويسرا اكثر لانها متنفس عذب
قلت انا اول مره بحياتي ( اطبها ) .. هههههههه بس الديره اكسبنسف غاليه ناااااااااااار
قال بالعكس انا اشوف انا رخيصه وبلاش !
صـــدمــــني قلتله شلون ؟
قال باليابان دخلنا عالي ومعيشتنا اغلى ف حنا نستفيد من السفر حاجتين ؟
الاولى / نستمتع سياحيا
الثانيه / نوفر فلوسنا ونجمعها لأن الصرف ارخص بأضعاف من اليابان
قلت ( ســعـــد عــيـنــك فـي ذمــتـــي )
قال : وااااات ؟
قلت نايس تو ميت يو ) وخليته ورحت اغني من الحسره وقلت :
_______________
ياجاي من ( طوكيـو ) .. مبعـوص بفلوسـه !
مانـي بمستغـرب ؟ .. ( اليابانـي ) يسـافـر
دراهمـك واااجــد .. ورحلـتـك مـدروسـه
متـى ؟ ماطقـت براسـك .. رحـت يالكافـر
تقعد في (( اوروبا )) .. أمير (( بقاع معسوسه ))
واي ديـره بخاطـرك !! .. طريقهـا وافــر
كـل شـي عنـدك رخيـص وتقـدر تحوسـه
وبلادك اعلى دخـل .. ( بالشاهـق / الزافـر )
كنت احسب النـاس ؟ .. بالمرغـوب مهووسـه
واثـر اغلـب النـاس ! .. بالممنـوع تتعافـر
مانـي بلومـك عـلـى بـذخـك وقامـوسـه
مــدام بـالـك مـاهـو بالـهـم متـنـافـر
انـا القـط الخـرده اللـي عنـدي ملموسـه
ولا انت ! في ( فيزتـك ) كـل شـي متوافـر
منحوس .. واللـي معـي ! هطفـه ومنحوسـه
ولا انت ! .. معك اللـي معهـا الواحـد يسافـر
بالمزح !! .. فالح وظافـر يـا بـو فٌنوسـه
وإلا الكرم ؟ مـا انـت فيـه ب فالـح وظافـر
منك تعلمت .. (( حكمـه )) .. شبـه مدروسـه
لكن ؟ وش اقـول : !! .. غيـر ان الله الغافـر
احـد ٍ يسافـر ! .. عشـان يوفـر فلـوسـه !!
واحد ٍ يجمٌع ؟ ... عشـان ,, يفكـر ! يسافـر ؟
وسلامتكم ياغالين