قصيده بعنوان خلان السعه

[هبوب الشمال]

(خلاّن السعه)
قصيده للشاعر ناصر بن تيسان ال رزق
**********
مل قلب هاجسه خرّب مزاجــــــه
ما مشى من درب حصّل به سـدادي
مخطرٍ من بين الأضلاع انزعاجه
من هواجيس لها عــــــادي وبــادي
طرف عيني ما لذيذ النوم ســاجه
ياهــــــــــني اللي يذوقون الرقــادي
من عشا لين الظلام الصبح باجـه
والنجوم تعدّها عيني عـــــــــــدادي
واللعين مقطب فوقي حداجــــــــه
مس حبله واستوى فوق الشـــدادي
يجعل الطرق السماح بها انعواجه
وان نقضت الحبل شــدّه بانعقــادي
وان رجع للقلب فرحه وانبهاجــه
هزه الهاجــــــــوس هز بارتعـــادي
ذا جزى اللي ما يفكر في خراجـه
يقضي الدرّاس بديون جــــــــــدادي
ما يحسّب مخرجه قبل انحراجـــه
لين لزمته الكلاليب الحـــــــــــدادي
كل ما يملك ولو قوّم حراجــــــــه
سيل حزمٍ اعترض له ســــيل وادي
من تبع شهوات قلبه وارتجاجــه
يستحق اللي يجيه مـــــن النكــــادي
ومن عمد درب الخطا مما يواجه
ومن ذرا له زرع يصبر بالحصـادي
كم صديق في الدجا ولّع سراجــه
ثم جزيته فــــي النصيحه بالعــنادي
من يرد المنتحي عقب اندراجـــه
ما يفيد مقفي صــــــــــوت المــنادي
وين خلاّن السعه قوم الجاجــــــه
من كلام العام غاشيهم ســــــــوادي
كلهم جاني بعذره واحتجاجـــــــه
كل ما عندي دفعته فــــــي البــلادي
منهم اللي قال خدمه وايّ حاجــه
ثم عجز يوفي بها عــــــند الوكـادي
مادح الروح مدحك له سماجـــــه
قـــــول مــاله فـــــعل يتلاه انتقـادي
لا تمدّح وأنت تكذب يا دجاجـــــه
ثم تصادف واحــــــــدٍ حاديه حـادي
من تمدّح بالحكا وقت انبهاجـــــه
تاه واصبح من طريق العـــز غادي
والله إني داري قبل انتواجــــــــه
ما ردي العزم يرقى فــــــي المبادي
من ركن به مثل من يبني زجاجه
ثم يجي بظلالها يبغـــــــــي البرادي
أو يخيّل له سراب في زراجــــــه
واخلفه في القيض من شل الورادي
بنت يالي طمعتٍ تبغي زواجـــــه
لي خطب يا بنت حـــــاذور السدادي
لا يغرّش من بعيد بالتعاجـــــــــه
رفقته منها تشــــــــــوفين الزهـادي
اطمحي للي على بيته مداجــــــه
للخوي والضيف والربع العـــــوادي
في الكرم معزاه ما تكفي نعاجــه
والقسا واللين عنده شـــــــــي عادي
من وزا به هو دواه وهو علاجه
للرّفيق يســـــــــــر ويضر المــعادي
الدريني جعل يفداه الحلاجــــــــه
ما يطلّع كلمتٍ مـــــــــــن غير قـادي
ما تغبي صيدته منه عجاجـــــــه
لبو مانع يشــــــــــهد الله والعبــادي
يوم جيته فز وارفع لي حجاجـه
قبل ما يبدي له اللي فـــــــــي فوادي
والعنا من خاطري والهم ماجــه
قـــــــــــــــول وافعال عليها الله بادي
عادته روحه لمن ينخاه عاجـــه
فـــــــي الشدايد دون ابن عمه يفادي
داريٍ إن الضيق يتلاه انفراجــه
وان حيات الرجــــــــل يتلاها النفادي
والدهر جرّب قراحه من هماجه
دارسٍ ســـــــلم الحضـــاره والبوادي
ختمها يا الله قاضي كل حاجـــه
فــــــــي هل المعروف تلحقني مرادي