وصف القهوة ::::: ( محمد القاضي )

[المناجي]

السلام عليكم ورحمة الله وبركاته



قصيده أشهر من نار على علم .. للشاعر الكبير محمد القاضي ..

يصف فيها القهوة بأسلوب شعري عجيب ..

يامن لقلب كل ما ألتم الأشفاق =من عام الأول به دواكيك وصفوق
يجاهد جنود في سواهيج الأطراق =ويكشف له أسرار كتمها بصندوق
الا عن له تذكار الأحباب وأشتاق =باله.وطف بخاطره طاري الشوق
قربت له من غاية البن مالاق=بالكف صافيها عن العذف منسوق
أحمس ثلاث يانديمي على ساق =ريحه على جمر الغضى يفضح السوق
حذراك والنيه وبالك والأحراق =واصح تصير بعاجل الحمس مطفوق
الا أصفر لونه ثم بشت بالأعراق =وبقيت كما الياقوت يطرب له الموق
وعطت بريح فاضح فاخر فاق =لاعنبر ريحه بالأنفاس منشــــوق
دقه بنجر يسمعه كل مشتاق =راعي الهوى يطرب الا دق بخفوق
واحشه بدله مولعه كنها ساق =بلورة منصوبة تقل غرنـوق
خله تفوح وراعي الكيف يشتاق =الا طفح له جوهر صح له لاق
قمور صغار كالزمرد بالأشعاق =وكبارها الطافح كما صافي الموق
وزله على وضحى بها خمس ارناق =هيل وسمار بالاسباب مسحوق
مع زعفران والشمطري الا انساق =ريحه مع العنبر على الطاق مطبوق
اذا اجتمع هذا وهذا بتيفاق =فـ صبه كيفت العوق عن كل مخلوق
بفنجال صين صافي عنه الارماق =تغضى وكرسيه غدان لمعشوق
الى صب فأصبر جوهره تقل شبراق=رنق تصور بالحمامه على الطوق
شكل غرا الفنجال صبغه كما راق =دم القلب وان مزع منه معلوق
خمر الا منه تساقى بالارياق =وعليه من صافي الورد مذلــــوق
راعيه كنه شارب ريق ترياق =كاس الطروب وسرور من ذاق له ذوق
يحتاج من خمر السكارى الى فاق =طفل يشف شفاه والعنق مفهوق
عبث يعيل بحبه منه ماماق =وهو يضاهي باهي البدر بعشوق
في وجنتيه الى غنج بارق حاق =عجل رفيفه بالطها الغرق بطبوق
سحر كتب من حبر عينيه بوراق =خديه صادين ونونين من فوق
كن العرق بخدودها حص ارناق =نثر على صفحات بلورة الشوق
الا تبسم شع واشرق بالآفاق =نور يفوق البدر سحار منطوق
وبالعنق كن المسك والورس براق =مامشخص في صدري الشاخ مدفوق
تمشي برفق خوفها مدمج الساق =يفصم حجول هزه الثقل من فوق
الا صفت لك ساعة وانت مشتاق =فأقطف زهر ملاق والعمر ملحوق
فالى حضر ماقلت عندي الأرزاق =بيدي كريم كافل كل مخلوق
هذا وصلوا عند ماناض براق =او ماشكى الفرقى شفيق لمشفوق
على النبي مازج زاج بالاوراق =وآله وصحبه عد ماسيق مسيوق

المنـــــــــــاجي

[ابومحمد الشامري]

الا صفت لك ساعة وانت مشتاق،،،،، فأقطف زهر ملاق والعمر ملحوق

قصيدة رائعة وكما قلت يا المناجي اشهر من نار على علم وكيف لا وصاحبها الشاعرالكبير عبدالله القاضي صح لسانك يا السنافي على هذه الدرر التي تلتقطها من عبق ورياحين الشعر النبطي.

[أبو محمد]

لاهنت يالمناجي على اختيار هذي القصيده الطيبه وفيها بعض الاخطاء المطبعيه

[المناجي]

ابوحمدالشامري ..

بيت غير طبيعي ..عرفت تختار درة القصيده .. لك مني كل موده وتقدير

تقبل تحياتي ..

[فهد بن محسن]

الاخ \ المناجي

تسلم يمينك على ماخطت .. وتشكر على ذكر هذه القصيده المشهوره للشاعر المشهور .. تحياتي لك يالمناجي

اخوك \ فهد بن محسن

[المناجي]

ابو محمد ..

ولا أنت طال عمرك .. أسمحلي العتب على الكبر ...

تقبل تحياتي

[المناجي]

فهد محسن ..

ويسلم من قال ... ولا هنت على الكلام الطيب

تقبل تحياتي

[عايض ال مطلق]

لاهنت يالمناجي

قصيده جاراها الوالد اللي يحفظها ويحفظ القاريء

اول ماعرفتها من الوالد الله يبطيء بأيامه

وفعلا ابيات جزال جزال جزال..

احببت رفعها ليستفيد منها القراء

صح لسان الشاعر القاضي والله يرحمه

بس كنت اتمنى ان الطباعه لم تخالفك في بعض المفردات

اقبل تحياتي

[الخديدي]

لاهنت اخوي المناجي تسلم يمينك
وصح لسان شاعرها

[مهرة النسيان]

تشبيه بليغ جدا في وصف القهوة ,,
رمز من رموز العرب ,,
صح لسان القاضي ,,
ولاهنت اخي على النقل المتميز,,