حبيبي لاتكبرها ترى الضيقه تجي وتروح = واناطالبك تكفى ياحبيبي لاتكبرها
ترى الدعوى بسيطه لاتزوّد فالجروح جروح = وانا بكتب قصيده فالمحبه وأنت شاعرها
أنا لولاك ماشيدت لي وسط القصيد اصروح = تراك أجمل قصيده حب أكسرها وأجبرها
تراك أنت الوحيد اللي سكن وسط الجسد والروح =و تراك أحلا عباره دايم أكتبها وأعبرها
تراك أنت البدر لامن طلع زاد الوضوح وضوح = تراك أحلام توقضني ولا ادري كيف افسرها
عطيتك من عروق القلب شيكٍ بالغلا مفتوح = وعطيتك كل كلمه من صميم القلب مظهرها
وتخطي ثم تخطي بس أقول بخاطري مسموح = أنا وشلون أطالع غلطتك ياكيف أناظرها
غيابك طال لين اصبح خبرنا بالعشق مفضوح=وكلٍ عارف القصه من اولها لياخرها
وطعونك خلت اعروق المحبه دمها مسفوح=تعال وبشر اطعونك ترى فازت خناجرها
ترى مقدر على صدك ومهما تروح أنا باروح = الين القاك واجدد محبتنا واطورها
وكلمه من ضميري قلتها لك تشفي المجروح= لجل عينك باكررها ولجل حبك باكررها
نصيحه:نترك الماضي ترى الضيقه تجي وتروح = وترى الدعوى بسيطه ياحبيبي لاتكبرها